شاعر هلالي ازهله المارد الاحمر فراح اتغزل في المريخ

مريخ السودان

* بحس الوطنية بطلق العنان لخيالي..

* أتغزل في المريخ رغم إني هلالي..

* أسلك طريقاً ما إتمشى قبالي..

* نقد أقلام الحسد منو ماني مبالي..

* رائع يا سودان في أفريقيا كعبك عالي..

* علمك يا بلد في رواندا رفرف عالي..

* حبك يا بلد هو الرصيد رأسمالي..

* مناي ليك دوام الانتصار متوالي..

* مريخ السودان ما ببخل عليك بمجالي..

* يا ند الهلال ليك معزتي وإجلالي..

* لشعب السودان يا (أبومصعب) خالي..

* بعطي الوطن حقه ولشعاري بوالي..

* نهج العصبية ما بمشيه إلا ضلالي..

* في إيه المهاترة للإعلام بقولوا سؤالي..

* الكاتب المهاتر ناقص عقل بتهيألي..

* مريخ السودان حققت نصراً غالي..

* وعلى حساب الخصم تأهلت من كيجالي..

* انتصارك مبروك لوطن الجدود الغالي..

* ومبروك كمان للصفوة وللرئيس الوالي..

* مريخ السودان عشق القليب الخالي..

* الأحمر الوهاج مذاق الكرة الحالي..

* في سماء رواندا اتوهج نجمك لآلي..

* زين الوجود بمشهد بديع وجمالي..

* التاكسي المزعوم طلع عجلة رالي..

* التاكسي سيح محتاج سيور وبلالي..

* مريخ السودان يا روعة تيمه الحالي..

* بقيادة الفلتة عجب الكل ياحلالي..

* مريخ السودان صاحب سمو ومعالي..

* النادي الأفريقي الدورو عظيم ورسالي..

* مع عتلة افريقيا ديمة حربه سجالي..

* سير يا بطل والهلال معاك طوالي..

* الأحمر الوهاج ألقى البيان التالي..

* انا فاكهة الكرة في حلي أو ترحالي..

* معروف للأفارقة الكميروني أو المالي..

* وأيضاً لكل العرب العراقي والصومالي..

* انا المارد الأفريقي الكاوي لعزالي..

* الفارس المغوار بيخشى الكل لي نزالي..

* اتوحد في هواي الجنوبي ومعاه شمالي..

* في جوبا وسواكن وسودري ودارمالي..

* ياجمهور الصفوة لي هبي تعالي..

* الموظف والمزارع والتاجر أو العتالي..

* في الرد كاسل احسنوا استقبالي..

* نحتفي بالانتصار الصنعوه عنوة أبطالي..

* من عاشق للوطن لامحرش لا طبالي..

* متحري الصدق في قولي وفي أفعالي..

* بخاف الجليل ومنو بترتعد أوصالي..

* مولاي ارحم ضعفي يا بر ويا متعالي..